Soomaaliya oo Geneva ku Soo Bandhigtay Horumarka Xuquuqul Insaanka

Geneva, Switzerland – Wasiirka Wasaaradda Qoyska iyo Horumarinta Xuquuqul Insaanka ee Xukuumadda Federaalka Soomaaliya, Danjire Khadiija Maxamed Al-Makhzoumi, ayaa khudbad ka jeedisay kulan heer sare ah oo looga hadlay xaaladda xuquuqul insaanka Soomaaliya, horumarrada laga sameeyay iyo hannaanka kala-guurka ee dalka.

Kulanka oo ka dhacay xarunta Qaramada Midoobay ee magaalada Geneva ayaa sidoo kale diiradda lagu saaray dadaallada Dowladda Federaalka Soomaaliya ee lagu xoojinayo ilaalinta iyo horumarinta xuquuqul insaanka. Wasiiradda ayaa sheegtay in Soomaaliya aysan si toos ah u gudbinayn warbixin gaar ah, balse ay warbixinnadeeda ku soo gudbinayso hannaanka rasmiga ah ee Golaha Xuquuqul Insaanka iyo habraacyada warbixinnada ee Golaha.

Waxay tilmaantay in Soomaaliya ay ka go’an tahay inay si joogto ah uga qeybqaadato hannaanada caalamiga ah ee dib-u-eegista iyo wada-shaqeynta dhinaca xuquuqul insaanka. Danjire Khadiija Maxamed Al-Makhzoumi ayaa sidoo kale xustay muhiimadda Qaraarka Golaha Xuquuqul Insaanka ee 60/28, iyadoo sheegtay inuu qeyb muhiim ah ka yahay jihada iyo dadaallada la xiriira marxaladda kala-guurka iyo xoojinta iskaashiga caalamiga ah.

Wasiiradda ayaa si gaar ah u adkaysay in hannaanka kala-guurku uu yahay arrin muhiim u ah marxaladda cusub ee Soomaaliya, isla markaana uu noqon doono mawduuc si weyn uga dhex muuqda doodaha iyo hawlaha kalfadhiga Golaha Xuquuqul Insaanka ee Geneva iyo kulamada Golaha Guud ee Qaramada Midoobay ee New York. Waxay sheegtay in Dowladda Federaalka Soomaaliya ay diyaar u tahay inay si mas’uuliyad leh u qaadato doorkeeda cusub, iyadoo sii xoojinaysa hay’adaha qaranka iyo hannaanada lagu ilaalinayo xuquuqul insaanka.

Ugu dambeyn, Wasiiradda ayaa caalamka la wadaagtay horumarka Soomaaliya ay ka sameysay dhismaha hay’adaha xuquuqul insaanka, gaar ahaan hirgelinta Guddiga Madaxa-bannaan ee Xuquuqul Insaanka Qaranka. Waxay caddeysay in Soomaaliya ay ka go’an tahay ilaalinta iyo horumarinta xuquuqda aadanaha, iyadoo uga mahadcelisay Qaramada Midoobay, hay’adaha caalamiga ah iyo dhammaan saaxiibbada Soomaaliya taageerada joogtada ah ee ay siiyaan dalka.

Wasiiradda ayaa ku soo gabagabeysay in iskaashiga caalamiga ah uu muhiim u yahay guusha iyo sii ambaqaadka hannaanka kala-guurka Soomaaliya iyo horumarinta hay’adaha dalka ee u xilsaaran ilaalinta xuquuqul insaanka.