Puntland iyo Mareykanka oo sheegay inay burburiyeen bakhaar hub oo Al-Shabaab leedahay

Maamulka Puntland iyo Mareykanka ayaa sheegay in si guul leh loo fuliyay howlgal ka dhan ah Al-Shabaab oo ka dhacay buuraha Al-Madow-Golis , gaar ahaan deegaanka Markad , halkaas oo lagu bartilmaameedsaday goob lagu keydinayay hub iyo saanad ciidan.

Sida lagu sheegay war kasoo baxay dhinacyada howlgalka, ciidamada ayaa weeraray goob ay sheegeen in Al-Shabaab u adeegsanaysay kaydinta hubka iyo rasaasta , kuwaas oo loogu talagalay taageeridda howlgallada kooxda iyo weerarrada ay ka fuliso Soomaaliya.

Howlgalka ayaa la sheegay inuu dhacay iyadoo la kaashanayo oo lala xiriirinayo hay’adaha amniga Puntland , waxaana Mareykanka iyo Puntland ay ku tilmaameen tallaabadan qayb ka mid ah howlgallo ballaaran oo lagu wiiqayo awoodda Al-Shabaab ee waqooyiga Soomaaliya.

Labada dhinac ayaa sheegay in bartilmaameedsiga goobaha lagu kaydiyo hubka iyo kaabayaasha kale ee taageera shabakadaha hubeysan uu yareynayo awoodda kooxda ee qorsheynta iyo fulinta weerarrada .

Puntland iyo Mareykanka ayaa sidoo kale sheegay in howlgalka uu qayb ka yahay dadaal joogto ah oo lagu wiiqayo awoodda Al-Shabaab, looga hortagayo in kooxda ay hesho goobo ay ku dhuumato, isla markaana lagu taageerayo xasilloonida iyo nabadda muddada dheer ee waqooyiga iyo bariga Soomaaliya.