Caqabado horleh oo soo wajahay qodista shidaalka Soomaaliya

Muqdisho (Caasimada Online) – Guddoomiyaha Hay’adda Batroolka Qaranka, Injineer Cabdulqaadir Aadan Maxamed oo wareysi siiyay warbaahinta dowladda ayaa faahfaahin ka bixiyay sababaha keenay dib u dhaca ku yimid hawsha qodista shidaalka laga soo saarayo xeebaha dalka oo kol hore la bilaabay, iyadoo la filayay in lasoo gabagabeeyo bishaan October.

Injineer Cabdulqaadir Aadan ayaa sheegay in dadaal xooggan lagu bixiyay sidii hawsha loo dedejin lahaa, loona soo gabagabeyn lahaa waqtigii horay loo shaaciyay. Hase yeeshee, waxa uu tilmaamay in ay soo korortay caqabad la xiriirta kacsanaanta badda, taas oo saameyn ku yeelatay howlihii socday, isla markaana sababtay dib u dhaca ku yimid jadwalkii shaqada.

“Horta shaqada waa socotaa waana sidii barnaamijka loogu talagalay, laakiin markasta waxbaa dhacaya sababtoo ah biyo aad u fog 3,500 oo mitir ah ayaa waxaa la bilaabay xiligii baddu kacsaneyd marka waxaas oo dhan ayaa isku aaday,” ayuu yiri Injineer Cabdulqaadir Aadan.

Sidoo kale, wuxuu xusay in qalabka qodista shidaalka ee ceelka Curad-1 ay cilad farsamo ku timid, taas oo sababtay in shaqadu hakad gasho muddo saddex toddobaad ah, balse markii ciladda la xalliyay, dib loo bilaabay hawlihii qodista shidaalka.

“Waxay ahayd qorshaha aan ugu talagalnay inaan taargedka gaarno 15-ka cisho ee ugu horreeyo bishaan October, laakiin waad iska garan kartaa markii wax dhacaan dib u dhac aya imaanaayo, marka qalabkii ayaa cilad ku timid marka waxaan ku qasbanaanay in aan dayactirno haddana dib loogu celiyo meeshii, waana shaqo culus,” ayuu yiri guddoomiyuhu.

Waxaa kale oo uu intaas kusii daray in illaa hadda la qoday 5,500 oo mitir, halka ay dhimman yihiin 2,000 oo mitir oo kale, waxaana uu xusay in dadaal lagu bixinayo sidii qaybta loo soo gabagabeyn lahaa sida ugu dhaqsiyaha badan.

“Hadda waxaan qodnay 5,500 oo mitir, marka waxaa noo haray 2,000, waana qaybta ugu muhiimsan,” ayuu mar kale yiri Guddoomiyaha Hay’adda Batroolka Qaranka.

Si kastaba, Dowladda Federaalka ayaa muddooyinkii dambe xoogga saareysay qorshayaasha la xiriira sahaminta iyo soo saarista shidaalka, iyadoo rajada laga qabo khayraadkan ay la xiriirto kobaca dhaqaalaha, abuurista fursado shaqo iyo kordhinta dakhliga dowladda.