War cusub oo kasoo kordhay muwaadinkii loo karantiilay Ebola

Muqdisho (Caasimada Online) – Wasaaradda Caafimaadka Xukuumadda Federaalka Soomaaliya ayaa maanta shaacisay natiijada laba baaritaan oo laga qaaday muwaadin Soomaaliyeed oo karantiil loo geliyay xiriir uu la yeeshay qof qabay cudurka Ebola, kuwaas dhammaantood noqday (Negative), taas oo ka dhigan in aan laga helin fayraska Ebola.

Sida lagu sheegay war-saxaafadeed ay wasaaraddu soo saartay, muwaadinka ayaa 12-kii Oktoobar 2026 la karantiilay, kaddib markii la ogaaday inuu xiriir toos ah la yeeshay qof qabay cudurka Ebola oo ku geeriyooday dalka Kenya 5-tii Oktoobar 2026.

Wasaaradda ayaa sheegtay in muwaadinka la geeyay xarunta karantiilka iyo daaweynta cudurka Ebola ee Isbitaalka Forlanini ee magaalada Muqdisho, halkaas oo si joogto ah loola socday xaaladdiisa caafimaad, iyadoo la raacayay habraacyada caafimaadka ee caalamiga ah.

Baaritaankii koowaad oo gudaha dalka lagu sameeyay 12-kii Oktoobar ayaa noqday mid taban (Negative). Baaritaankii labaad oo 19-kii Oktoobar loo diray shaybaar dibadeed ayaa isaguna xaqiijiyay natiijadii hore, iyadoo jawaabta la helay 23-kii Oktoobar 2026.

Sidoo kale, Wasaaradda Caafimaadka ayaa sheegtay in muwaadinku uusan muujin wax calaamado ah oo la xiriira cudurka Ebola intii uu ku jiray xarunta karantiilka.

“Wasaaradda Caafimaadka, iyadoo tixgelinaysa natiijooyinka labada baaritaan, dhammaystirka muddada dabagalka, xaaladda caafimaad ee muwaadinka iyo qiimeynta khatarta caafimaadka bulshada iyadoo la raacayo habraaca caalamiga ah xaqiijinta baaritaannada Cudurka, waxay go’aamisay in muwaadinka laga saaro karantiilka, iyadoo la raacayo habraacyada caafimaadka ee u degsan dalka iyo kan caalamiga ah,” ayaa lagu yiri qoraalka.

War-saxaafadeedka ayaa intaas ku daray in tallaabooyinka karantiilka iyo kormeerka caafimaad loo fuliyay si waafaqsan habraacyada caafimaadka, iyadoo mudnaanta la siinayay badqabka muwaadinka iyo ilaalinta caafimaadka bulshada.

Ugu dambeyn, Wasaaradda Caafimaadka ayaa bulshada ugu baaqday inay isdejiyaan, la shaqeeyaan kooxaha caafimaadka, kana fogaadaan faafinta wararka aan la xaqiijin iyo takoorka muwaadinka iyo qoyskiisa. Waxay sidoo kale sheegtay inay bulshada la wadaagi doonto xog cusub marka la xaqiijiyo.